ദോഹ: ഭൂരിപക്ഷം വിമാനയാത്രക്കാരും ഇപ്പോൾ ടിക്കറ്റ് നേരത്തെ ബുക്ക് ചെയ്യുന്നില്ലെന്നും 75 ശതമാനം യാത്രക്കാരും യാത്രയ്ക്ക് 60 ദിവസത്തിനുള്ളിലാണ് ടിക്കറ്റ് ബുക്ക് ചെയ്യുന്നതെന്നും ഖത്തർ എയർവേയ്‌സ് ഗ്രൂപ്പ് സിഇഒ ഹമദ് അലി അൽ ഖാതിർ പറഞ്ഞു.

ഇത് വിമാനക്കമ്പനികൾക്ക് മേൽ സമ്മർദ്ദം വർദ്ധിപ്പിക്കുകയും മുൻകൂട്ടി കാര്യങ്ങൾ ആസൂത്രണം ചെയ്യാൻ സാധിക്കാതെ വരികയും ചെയ്യുന്നു. ബ്ലൂംബെർഗ് ടിവിയുമായി നടത്തിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.

"യാത്രക്കാർ വൈകിയാണ് ബുക്ക് ചെയ്യുന്നത്, എങ്കിലും ഡിമാൻഡ് ഇപ്പോഴും വളരെ ശക്തമാണ്," അദ്ദേഹം പറഞ്ഞു. ഖത്തർ എയർവേയ്‌സിലെ നാലിൽ മൂന്ന് യാത്രക്കാരും ഇപ്പോൾ യാത്രയ്ക്ക് 60 ദിവസത്തിനുള്ളിലാണ് ടിക്കറ്റ് ബുക്ക് ചെയ്യുന്നത്.

ഈ വർഷം ഫെബ്രുവരിയിൽ ആരംഭിച്ച മേഖലയിലെ സംഘർഷമാണ് വൈകിയുള്ള ബുക്കിംഗിന് കാരണം.

വ്യോമാതിർത്തികൾ ഇടയ്ക്കിടെ അടയ്ക്കുന്നതും ഇന്ധന വിലയിലെ മാറ്റങ്ങളും വ്യോമയാന വ്യവസായത്തിലുടനീളമുള്ള പെട്ടെന്നുള്ള ഷെഡ്യൂൾ മാറ്റങ്ങളും യാത്രക്കാരെ കാത്തിരിക്കാൻ നിർബന്ധിതരാക്കുന്നു.

ഏറ്റവും ലാഭകരമായ റൂട്ടുകളിൽ സേവനങ്ങൾ വർദ്ധിപ്പിക്കാനും, വരുമാനം കുറഞ്ഞ റൂട്ടുകളിലെ സേവനങ്ങൾ താൽക്കാലികമായി നിർത്തിവെക്കാനും മാനേജ്‌മെന്റ് തീരുമാനിച്ചതായി അൽ ഖാതർ പറഞ്ഞു.

അതേസമയം, ലോകത്തിലെ ഏറ്റവും മികച്ച എയർലൈൻ എന്ന പദവി ഖത്തർ എയർവേയ്‌സിന് ഈ വർഷം നഷ്ടമായി.

2024-ലും 2025-ലും സ്കൈട്രാക്സ് (Skytrax) പുരസ്കാരത്തിൽ ലോകത്തിലെ ഏറ്റവും മികച്ച എയർലൈനായി ഖത്തർ എയർവേയ്‌സ് തിരഞ്ഞെടുക്കപ്പെട്ടിരുന്നു. യാത്രക്കാരുടെ വോട്ടെടുപ്പിന്റെ അടിസ്ഥാനത്തിലാണ് ഈ പുരസ്കാരം നൽകുന്നത്. ഈ വർഷത്തെ ഏറ്റവും മികച്ച വിമാനക്കമ്പനി സിംഗപ്പൂർ എയർലൈൻസ് ആണ്.

ഖത്തർ എയർവേയ്‌സിന്റെ സേവനങ്ങളെക്കുറിച്ച് ഖത്തർ പൗരന്മാരിൽ നിന്ന് സോഷ്യൽ മീഡിയയിൽ ചില പരാതികളും ഉയർന്നിരുന്നു.