ദോഹ: മാലിക് ദീനാർ കോളേജ് ഓഫ് ഫാർമസി അലൂമിനി അസോസിയേഷൻ – ഖത്തർ (Qatar MDCPians) സംഘടിപ്പിച്ച ഖത്തർ എംഡിസിപിയൻസ് ക്രിക്കറ്റ് പ്രീമിയർ ലീഗ് 2026-ൽ ഡോസ് ഡെവിൾസ് (Dose Devils) കിരീടം സ്വന്തമാക്കി.

ഗറാഫയിലെ പെർലിംഗ് ഇന്റർനാഷണൽ സ്കൂൾ ഗ്രൗണ്ടിൽ നടന്ന ആവേശകരമായ ഫൈനൽ മത്സരത്തിൽ ശക്തരായ ഫാർമ കൈനെറ്റിക്സ് ടീമിനെ പരാജയപ്പെടുത്തിയാണ് ഡോസ് ഡെവിൾസ് ജേതാക്കളായത്. മികച്ച പോരാട്ടവീര്യവും കായിക മികവും നിറഞ്ഞ ഫൈനൽ മത്സരം കാണികൾക്ക് ആവേശകരമായ ക്രിക്കറ്റ് അനുഭവമായി.

ഫൈനൽ മത്സരത്തിലെ മികച്ച പ്രകടനത്തിന് അബ്ദുൽ റഹിമാൻ എരിയാൽ മാൻ ഓഫ് ദി മാച്ച് പുരസ്കാരം നേടി. ടൂർണമെന്റിലുടനീളം സ്ഥിരതയാർന്ന പ്രകടനം കാഴ്ചവെച്ച ജസ്സിർ മാങ്ങാട് പ്ലയെർ ഓഫ് ദി ടൂർണമെന്റ് ആയി തിരഞ്ഞെടുക്കപ്പെട്ടു.

ഫാർമ സൂപ്പർ കിങ്‌സ്, ഫാർമ വേരിയർസ്, ഡോസ് ഡെവിൾസ്, ഫാർമ കൈനെറ്റിക്സ് എന്നീ നാല് ടീമുകളാണ് ടൂർണമെന്റിൽ പങ്കെടുത്തത്.

മത്സരങ്ങൾ ഷെരീഫ് മേപ്പുരി, നവീൻ ക്രിസ്റ്റീഫോർ എന്നിവർ നിയന്ത്രിച്ചു. വിജയികൾക്കും വ്യക്തിഗത മികവ് പുലർത്തിയ താരങ്ങൾക്കും ട്രോഫികളും പുരസ്കാരങ്ങളും ചടങ്ങിൽ വിതരണം ചെയ്തു.

ക്രിക്കറ്റ് മത്സരങ്ങൾക്കൊപ്പം കുടുംബാംഗങ്ങൾക്കും കുട്ടികൾക്കുമായി വിവിധ കലാ-സാംസ്കാരിക പരിപാടികൾ, വിനോദ മത്സരങ്ങൾ, ഗെയിമുകൾ, സമ്മാന പദ്ധതികൾ എന്നിവയും സംഘടിപ്പിച്ചു. ഖത്തറിലെ എംഡിസിപിയൻസ് അംഗങ്ങളും കുടുംബാംഗങ്ങളും പങ്കെടുത്ത പരിപാടി മുൻ വിദ്യാർത്ഥികൾ തമ്മിലുള്ള സൗഹൃദവും ഐക്യവും കൂടുതൽ ദൃഢമാക്കുന്ന വേദിയായി മാറി.

പരിപാടിക്ക് ആരിഫ് ബംബ്രൺ, ഹനീഫ് പേരാൽ, അബ്ദുൽ റഹിമാൻ എരിയാൽ, ഷംനാദ് കല്ലാർ, അഷ്റഫ് നെല്ലിക്കുന്ന്, ഷാനവാസ് ബേട്രിയ, അജ്മൽ റോഷൻ, സുലൈമാൻ അസ്‌കർ, ഹസീബ്, ഉസൈർ മുഹമ്മദ്, നൗഫൽ, ജസ്സിർ മാങ്ങാട്, റിയാസ് എന്നിവർ നേതൃത്വം നൽകി.